ازاي أتعلم اللغة الإنجليزية من البداية؟ وإزاي أطور الإنجلش من غير كورسات؟

أولاً: لازم تعرف أن رحلة التعلم لا تتوقف. احنا عايشين عشان نتعلم، والرحلة دي مستمرة لحد أخر يوم في حياتنا.

مفيش حاجة اسمها أنا خلاص اتعلمت انجليزي، لو فاكر انك بعد شهر أو سنة خلاص هتوصل للمستوى اللي يخليك متتعلمش تاني فا يؤسفني أقولك ان انت فاهم الموضوع غلط.

دا اللغة نفسها بتتطور ومصطلحات بتظهر ومصطلحات تقدم، وتريندات تطلع وتنزل، فا هقولك ازاي تتعلم انجليزي وتطور نفسك فيه بدون توقف، وهيكون أداة معاك طول حياتك، مش مجرد تجهيز لمقابلة شغل أو استعداد عشان تشتغل كول سنتر.

ثانياً: الأهم من الخطة والمصادر هي الاستمرارية. 

مفيش خطة هتنفعك لو مش شغال فيها كل يوم. والعكس صحيح، لو مستمر على أي خطة مذاكرة أو طريقة تعلم فا هي هتنجح عاجلاً أو أجلاً.

طيب ازاي تختار خطة للمذاكرة بنفسك؟

شوف الأول انت اهتماماتك ايه وأولوياتك ايه وحطهم في روتين يومك.

لازم الموضوع يكون ممتع. ناس كتير اتعلمت انجلش وبقوا fluent وهما بيتفرجوا على أفلام وبيلعبوا أونلاين مع أجانب.

لو بتحب الروايات اقرا كتب انجلش للمبتدئين او قصص أطفال في البداية، لو بتحب الأفلام اتفرج على أفلام كرتون أجنبي في البداية وبعدين اعلى بالمستوى.

لو انت شخص جد، يبقى تسمع أخبار وتقرا أخبار بالانجلش، وتسمع بودكاستات علمية.

لو من هواة علم النفس، اقرا مقالة كل يوم بالإنجلش واكتشف الكلمات الجديدة.

أهم حاجة تكون حاجة ليها علاقة باهتماماتك وهواياتك، عشان متزهقش بدري بدري.

طيب انت مستعجل وعايز الزتونة على طول، كالعادة مستعجلين كدا.

الزتونة تكمن في حاجة اسمها الimmersion

احنا قعدنا سنين وسنين بناخد مادة الانجليزي في المدرسة، والمحصلة النهائية كانت ضعيفة، ودا بسبب اننا مكناش بنعتمد على التكرار، ومكناش بنعتمد على استخدام مصادر مختلفة للاستماع والتحدث، ومكناش محاوطين نفسنا ببيئة بتتكلم انجلش.

عشان كدا تلاقي أطفال صغيرين في مدارس ايجيبت بيتكلموا انجليزي أحسن مننا. دا لأنهم بيتعلموا كإنها لغتهم الأولى، عن طريق انهم يشوفوا بعينهم ويسمعوا بودانهم اللغة..مش مجرد دروس وحفظ كلمات وامتحانات.

فا المطلوب منك انك تimmerse yourself

عن طريق ان اللغة تكون قدامك بتشوفها وتسمعها طول اليوم وكل يوم. جزء أساسي من حياتك.

بس انت اللي استعجلت تعرف الزتونة على طول، وطبعاً الكلام سهل، والتطبيق بياخد وقت.

خليني أقولك ان في نوعين من الimmersion

Intensive & Extensive

الIntensive immersion هو انك تفضل تتعرض كل يوم لمقالات وبودكاستات جديدة مستواها أعلى منك شوية بحيث تلاقي حاجات صعبة وجديدة شوية وتحاول تفهمها من السياق وتوقف اللي بتسمعه وتروح تشوف المعنى وترجع تاني، ودا بيخليك تتعلم حاجات جديدة.

الextensive immersion هو انك تسمع حاجة أو تشوف مسلسل وانت فاهم 90% منه أو أكتر، ومش شايف صعوبة فيه، بس بتكرره كتير، ودا مفيد لحتة الautomatism

ايه هو الautomatism؟ 

دي حاجة لو عرفتوها تبقوا عمدة.

الأوتوماتيزم هو اللي انت بتحلم بيه بخصوص اللغة، انك تتكلم بشكل تلقائي من غير ما تحاول تترجم في دماغك الأول.

يعني التكرار الكتير للحاجة اللي انت already عارفها بيخلي مخك يعتبرها زي لغتك الأولى لما تيجي تتكلم.

طيب تستخدم انهي نوع من الimmersion

لازم توازن بين الاتنين، نظراً انهم بيكملوا بعض، وهيوصلوك للمستوى اللي انت عايزه.

طب ايه الدليل عالكلام دا؟ وايه علاقته بالshadowing؟

الدليل ان ابن خالتك بعد أول أسبوع في السعودية هتلاقيه بيقولك الجوال والدوام وهلا والله والسيارة..الخ

وانت بعد أول سيشن في أي كورس انجليزي هتبدأ تقول وورر بدل ووتر..اللي هي ميا يعني.

والموضوع بديهي، التكرار بيخليك تقلد، انت لو ربنا كرمك ورحت أجازة شهر في أسوان هتلاقي نفسك بتلقط منهم حاجات، ولو قعدت فترة مدينة المنصورة أو الشرقية هتلقط مصطلحات وجزء من اللهجة وانت بتسمعهم كتير.

فا لما تسمع من مصادر native كتير وتبدأ تكرر وراهم بنفس الtone واللهجة والطريقة، طبيعي مع الوقت عقلك يتعود على دا وتبدأ تطلع منك اللهجة والنطق بالشكل اللي انت اتعودت تسمعه وتتدرب عليه.

ولو مش بتسمع بشكل كافي مش هتعرف تتكلم بشكل كويس..لازم تسمع نطق الكلمة وانت بتتعلمها زي ما بتتعلم ازاي تكتبها. عشان مشكلة شائعة عندنا اننا بنتعلم الكلمة من غير صوت وساعات بنتعلمها من مصدر بيقولها غلط، فا بتثبت في دماغنا غلط.

وطبعاً متحفظش كلمات، لازم الكلمة تكون في سياق معين زي جملة أو مثال، وتكرر المثال دا وانت فاهم معناه، عشان تستفيد.

وطبعاً يفضل انك تجرب طرق مختلفة ومصادر مختلفة لحد ما تلاقي اللي بيشتغل معاك، أنا بقولك اللي اشتغل معايا انا وطور اللغة بتاعتي وبقيت بستخدمه في تعلم اللغات.

وطبعاً مش محتاج أقولك انك قبل ما تعمل دا كله، لازم تبدأ بداية عادية الأول زي انك تتعلم الأساسيات عن طريق مصادر زي دولينجو أو أي أبلكيشن يأسسك صح ويعرفك شوية كلمات ومعاني أساسية تقدر تسمعها وتكتبها وتشوفها جوا أمثلة قبل ما تبدأ شادوينج أوimmersion

ولازم تكون حابب الprocess اللي اختارتها لنفسك عشان تقدر تكمل فيها.

مش لازم تفضل باصص للنتايج وبس، خد وقتك واستمتع برحلة التعلم، اللي زي ما قلتلك في البداية هي رحلة مبتخلصش.

واعقد النية ان انت بتستثمر وقتك في حاجة مفيدة، وانك لو اتطورت بنسبة 1% كل يوم دا كافي انه يخليك شخص تاني بعد سنة واحدة.

عشان المشكلة دايماً مش في الخطة ولا في المصادر، المشكلة في عدم الاستمرارية، والتشتت بين المصادر اللي بقت متاحة بالملايين.

فا حاول متزودهاش على نفسك لا بعدد المصادر، ولا بعدد ساعات المذاكرة، عشان مخك يعرف يستوعب وميتقفلش منك. خير الأمور الوسط.

دي رسالتي النهارده ليكم، في يوم الجمعة 28/11/2025

بالتوفيق ليكم جميعاً